mobili versija | standartinė versija
main-image
Knyga žemaitiškai

Skouda rajuona literātu poezėjės, pruozas, pjesiu, miniatiūru rinktėnė, katruo īr žemaitėška dabā rašontiu literatu kūrība.Didžiuojė dalis kūriniu i niekor nespausdintė.Šins leidinīs īr septintuojė Skouda savivaldībės viešuosės bibliuotėkas išleista kninga. 2008 m.


Īžonga

Pernā jau švėntiem jubiliejus, soejė pinkiuolėka metu, kāp išejė pėrmuojė patiū surinkta rajuona literatu kūrības kninga „Pri Bartuvuos ėr Lou­buos“ ėr dešimtės metu, kāp pasiruodė Mukienės Danutės sudarīta žemaitiu poezėjės rinktėnė „Sava muotinu kalbo...“ Priš dešimti metu išejė Girdenė Aleksa ėr Pabriežas Jūzapa „Žemaitiu rašība“.

Žemaitē jod vėsor. I draugėjės jungas, knīngas leid Vėlniuou, Klaipieduo, Telšiūs ėr kėtor. Bet bene patīs keitiausė īr Skouda pašalė žemaitē. Sava kninguo „Esė aplink puoezėjė ėr esima“ propesuorė Daujuotātė Vėktuorėjė raša: „Že­mai­tėškoma dvasia nu Varniū, daug liemusiu Lietuvuos kultūrā, nu Žemaitiu Kalvarėjės – Kretinguos, priš pat kara išaugėnusi Vītauta Mačerni, Untuona Monči, Justina Mėkuti, īr pasėslinkusi Mažeikiu – Skouda linkou“.
Šiamė omžiou Skouda savėvaldībės viešuoji bibliuoteka skelbė jau tretiuji žemaitėškas kūrības konkursa. Šiuo kninguo ėr spausdėnamė tu konkursu nugalietuoju darbā. Tēp pat idietė ėš rajuona kėlusiu ar anamė gīvenusiu žemaitiu eilierašte ar pruozas korėnē.
Nerēk nuorietė, ka vėsė būtom kap žemaitiu kurības meistrū Untolė Edmonda komedėjės, Tamošauskė Dalės, Žvinklė Pranė ar dar keliū autuoriu eilieraštē. Bet ėr tēp tarps terp minietu žemaitiu rašītuoju ėr kėtū šiuos knīngas autuoriu īr stėprē somažiejės.
Parskaitės lietovėška eilierašti, gali matītė, kuo ons verts, vuo žemaitėškė žuodē patīs savaime sokor poezėjė, ėr mažaraštis žmuogos paraša nebluoga eilierašti.
Didili darba atlėikt Mukienė Danutė, leisdama žornala „Žemaitiu žemė“.
Sekdamė mumis sava knīngas pradiejė leistė aukštaitē kupiškienā, pasvalėškē ėr vėsuokėi kėtė. Tad galem džiaugtėis kou torem, vuo torem že­mai­tėškėms žuodems soteiktė gīvībė ir anus tartė kėkvėina dėina.

JUONAUSKIS Stanisluovs