Balondė 23 dėina gana nemažos būrīs smalsiū skoudėškiu sosėtėka so kultūroluogė Kuprelītė Alduono. Ana so suejosēs rokavuos aple tautinius žemaitiu apdarus – tėik muotrėšku, tėik vīru.  

Per paskaita vėsė ruoduomė vaizdā bova pajimtė iš Lietuvuos muzieju kuolekciju, vuo klausītuojē dėdlē gerā soprata, ka žemaitiu spalvas īr rauduona-balta, dar jouda, žali... Vuo sėjuona ėr lėimenės dermē tor būtė spalvū kontrasts. Lektuorė paruodė nuotraukas iš aukštuosės maduos dizainerė Statkevīčiaus Juoza apriedū kuolekcėjės, sokortuos panauduojint audinius, ėšaustus pagal tautėnė kuostėma tradėcėjės. Tėkrā būsem drousesnės panauduotė tautėnės apronguos detalės sava drabožems!..  

Par edukacėjė lektuorė apriedė vėina sosėtėkėma dalīvė sava atsėvežto tautėnio kuostiomo. Pamatiem, kāp žemaitiu muotrėškas poušies, kāp galiejė pagerinė sava ėšvaizda, kāp gīnies no šaltė panauduodamas „raištelios“ (skaras) ėr kam bova reikalings kvartūgs. Apriedītuoji bova dėdlē puiki ėr patėkėna, ka pavasarė viesa tėkrā nebaisi (žiūr. nuotraukas). 

Šės sosėtėkėms īr pėrmāsis iš rėnginiū pagal Skouda rajuona savivaldībės Granauskė Ruomualda viešuosės bėbliuotekas parėngta ėr Lietuvuos kultūras tarības so Skouda rajuona savėvaldībės administracėjė parėmta pruojekta „Verd gīvenėms žemaitiu truobuo“.