Artiejint Tarptautėnē gimtuosės kalbuos dėinā, katrou pruovėjem vaserė 21-uo, Skouda rajuona savėvaldībės R. Granauskė vėišuoji bėbliuoteka so Skouda žemaitiu draugėjė kvėit rašītė žemaitiu kalbuos dėktanta. Šimeta tou dėrbuom jau devinta karta, bet tėik daug rašiusiu dā nikumet nebova.

Dėktanta tėkslā – pruopagoutė žemaitiu kalba ėr muokītėis anuos gramatikas.

Rašītė dėktanta gal vėsė solaukė 14-as metu, nepriklausuomā no anū gīvenamuosės vėitas.

Kap ėr onkstiau, šimeta galiejė rašītė Skouda rajuona savėvaldībės R. Granauskė vėišuojie bėbliuotekuo (Dariaus ėr Giriena g. 25B) arba veizont tėisiuogėnė transliacėjė interneta suocialėnė tinkla „Facebook“ šiuos bėbliuotekas paskīruo. Tėi, katrėi rašė, veiziedamė dėktanta transliacėjė internetė, par 30 mėnotu po anuos toriejė atsiūstė teksta „Word“ pormato arba noskenouta, nopaveikslouta ronko rašīta varijanta elektruonėnio pašto.

Kuožna meta dėktanta raša žemaitē ne tik ėš Žemaitėjės, bet ėr ėš kėtū Lietovuos regijuonu, net ožsėinė. Pasėtruopėi ėr vėns kėts sava gebiejėmus žemaitiu kalbuos rašībuo benuoris ėšmiegintė aukštaitis. Ta kuožna meta laukam kuo dėdesnė dėktanta dalīviu būrė.

Vaserė 6 d. žemaitiu kalbuos dėktanta rašė rekordinis skaičios – 85 žmuonis: 15 vėituo, t. ī. Skouda rajuona savėvaldībės R. Granauskė vėišuojie bėbliuotekuo, vo dā 70 sava darbus atsiuntė elektruonėnio pašto. Šėrdės džiaugas, ka šin karta tarp rašiusiūju daug jaunuomenės – muokėniū. Nuors ne ėš mūsa rajuona muokīklu. Ėš Skouda kėlės kalbėninks pruop. Pabrieža Jūzaps gimtouji rajuona laika žemaitiu kalbuos tvėrtuovė, bet mūsa muokėniū dėktants nesoduomėn. Tėisa pasakios, nesoduomėn, nepatrauk ons ni Skouda rajuona muokītuoju. Nuors ėš kėtū rajuonu žmuonis, katrėi dėrb pedaguogini darba, raša. Belėikt vierītė, ka kėtās metās padietės pasėtaisīs.

Dėktanta dalīviu gebiejėmā būs vertėnamė, atsėžvelgont i kraštietė kalbėninka dr. Pabriežas Jūzopa veikalė „Žemaitiu kalba ėr rašība“ ėšdiestītas šiuos kalbuos gramatikas taisīklės.

Vo vaserė 21 d. 17 val. Tarptautėnē gimtuosės kalbuos dėinā skėrtamė koncertė, katras būs Skouda rajuona savėvaldībės Romoalda Granauskė vėišuojie bėbliuotekuo, padėrbė parvės mažiau klaidū būs apduovėnuotė. Nuors i tou koncerta kvėitam ne tik rašiusius dėktanta ėr ne tik žemaitius. Pernā metu pabaiguo ėš mūsa rajuona kėlusi kompuozituorė, vėsuo Lietovuo žėnuoma mozėkas pedaguogė Raišotienė Juolanta ėšlēda jau tretioujė autuoriniu dainū kninga „Spalvuotė nīkštokā“, ta vaserė 21-uo tou kninga ėr prėstatīsem. Vo kāp kėtēp gal prėstatītė dainū kninga, je ne koncerto?! Ta ons ėr būs – sovažious daugībė dainėninku kuolektīvu ėr suolistu ėš Plungės „Saulės“ gimnazėjės ėr Plungės Mīkuola Oginskė mena muokīklas. Tuokė koncerta Skoudė dā nikumet nier bovė. Būs poikē ėr garsē. Atēkėt pasėveizietė ėr pasėklausītė!..