Bėrželė 13 d. Skouda rajuona savėvaldībės R. Granauskė vėišuojie bėbliuotekuo bova trets pruojekta „Verd gīvenėms žemaitiu truobuo“ rėngėnīs „Kas skomb žemaitiu truobuo?“. Anamė glauni vėišnė – dainėninkė, etnomozėkoluogė, vėsuos sava veikluos besėrūpėnonti folkliuora ėr tautėškoma ėškeravuojėmo, LRT laidū vediejė dr. Sungailienė Luoreta mumis paragėna dā karta pajostė žemaitėškas dainuos, žemaitėšku puosakiu, patarliu, pasakuojėmu svarba, ka galietomem pasėjostė eso nu žemės, nu Žemaitėjės. Vėsa šin pruojekta finansou Lietuvuos kultūras tarība ėr rem Skouda rajuona savėvaldībės administracėjė.
Tėkamies, ka rėngėnė emuocėnis „ožkrats“ pamačīs tonkiau atmintė etnėnės žemaitėškas mūsa šaknis. Tuoks ėr bova bėbliuotekas pruojekta tretiuojė rėngėnė „Kas skomb žemaitiu truobuo?“ tėkslos.
Rėngėnė vediejė Sungailienė Luoreta īr kėlosi ėš Skouda. Vieliau so šeimo gīvena Palonguo. Vuo baigosi muokslus LMTA, Vėlniou sobūrė žemaitėška mozėka atlėiktonti folkliuora ansambli „Virvytė“. Luoreta īr TV laidū „Duokim garo!, „Kulinarinės kelionės“ „Gero ūpo!“, „Folkšokas“ vediejė, televizėjės pruojekta „Chorų karai“ ontruojė sezuona vertėnėma kuomisėjės narie. Ana organizou semėnarus aple regijuonini dainiavėma, skaita pranešėmus regijuonėnies ėr šalėis kuonfėrėncėjuos.
Dėdėlē gražē Sungailienė Luoreta vedė klausītuojus par šeimuos gīvenėma – gėmėms, veselė, naus ūkis, budinkā... Dainuos atsėvierė žemaitiu jautroms gamtuos gruožiou – paukštieliu gėismē, žalėms jevams. Bova apdainioutė žemės darbū papruotē ėr pėimėnieliu rūpestelē.
Vėišnē dainioujint žemaitėškas dainas, toravuojė mūsa krašta folkliuoristės – Pajarskienė Vita so Žiemelienė Sigito – ėr anū folkliuora kuolektīvu dainėninkā.
Rėngėnie grajėjė Šaukliū kaima kapela „Kadagys“. Tas kuolektīvs sosėkūrė priš tris metus. Anuo koncertūs skomb tradėcėnė lietovėška liaudėis mozėka (ne folkliuors), katra klausītuojems sokor nuognē gera nuotaika vėsuokiuos švėnties. Kapela stėngas ėšlaikītė mozėkas skombesė autentėškoma, bet nebėjė ėr paimpruovizuotė – soteiktė sava mozėkā asablīvoma.
Gražē skombiejė paskotėnės dainas, gražē sokuos draugīstės ratielis!..
Ož bėndrīstė pruojektė „Verd gīvenėms žemaitiu truobuo“ bėbliuoteka nuognē diekavuo Skouda muziejou, Skouda mena muokīklā ėr tautuodailėninkē Malūkātē Rūtā. Vo ož vėsėms krūvuo maluonē praleista laika – vėsėms gausē sosėrinkosėms.
