Spalė 25 d. i R. Granauskė bėbliuoteka suējė nemažos būrīs vākū ėr muokiniū nu darželėnoku lig gėmnazėstu. Anėi susirinka i kuožnametė, šimeta – jau 23-iouji, kuonkorsa „Skaitīmā žīemaitėškā“ rajuona etapa. I kuonkorsa atvīka 42 skaituovā iš Skouda ėr Īlakiū vākū luopšieliu-daržieliu, Skouda Bartuvuos pruogėmnazėjės, Skouda P. Žadeikė, Īlakiū ėr Muosiedė gėmnaziju. Dėdėlis dalīviu skaičios žadėn mėslė, ka žemaitiu kalba rokousės ėr būsėmas skuodėškiu kartas.
Švėntėnė nuotaika kūrė jaunuosės dainininkės Daukielātė Ėglė, Vasiliauskātė Elzė ėr Matutītė Jostė, vuo rėngėni vedė Skouda literatu kloba „Nuojos“ narie Lekniovienė Danotė ėr R. Granauskė bėbliuotekas vīriausė bėbliuotekininkė, kraštuotīrininkė Untulītė-Paduolskienė Muonėka.
Skouda rajuona mers patvėrtėna kuomėsėjė vertintė skaituovu kalbuos aiškoma, artistėškoma, teksta tinkamoma aspektus. Kuomėsėjės pirmininkė – filoluogė, literatūroluogė, Skouda rajuona kultūras cėntra rėngėniū režisierė Zabitienė Dalė, narē – Švėitėma ėr spuorta skīriaus vīriausė specelistė Jesienė Alduona, Skouda luopšelė-darželė muokītuojė Bernuotienė Rasa, Skouda rajuona savėvaldībės tarības narie Budrienė Daiva, Skouda rajuona kultūras cėntra Nuotienu skīriaus rėngėniū uorganėzatuorė Juonauskienė Giedrė ėr Žemaitiu tetra režisierios Untulis Edmonds.
Skaituovu repertuars bova dėdėlē īvairos, tad kuomėsėjē teka nelėngva uždoutės atrinktė Skouda rajuona atstuovus dalīvautė regijuonėnemė kuonkorsa „Skaitīmā žemaitėškā“ etapė.
Ligmuokīklėnė ėr prišmuokīklėnė omžiaus kateguorėjuo I vėita paskėrta Orbatē Vestā (Skouda luopšielis-daržielis), II vėita teka Puociou Nedou (Skouda luopšielis-daržielis), III vėita pelnė Valinskis Muotiejos (Muosiedė gėmnazėjės prišmuokīklėnė klasė). Švėitėma skīriaus nuomėnacėjė paskėrta Šīpalītē Gostē (Īlakiū luopšielis-daržielis, 6 m.).
1–4 klasiu muokiniū kateguorėjuo I vėita paskėrta Skersītē Samantā (Muosiedė gėmnazėjė, 3 kl.), II vėita – Antanavičiūtē Austiėjē (Bartovuos pruogėmnazėjė, 2 kl.), III – Stripinītē Unē (Īlakiū gėmnazėjė, 1 kl.).
5–9 klasiu kateguorėjuo prizėnės vėitas paskėrtas tēp: I vėita – Uodinou Uorestou (P. Žadeikė gėmnazėjė Ib kl.), II vėita – Eitotiou Rītiou (Muosiedė gėmnazėjė, Ia kl.), III vėita – Zabitītē Danielā (Bartuvuos pruogėmnazėjė, 6a kl.).
Bėbliuotekas nuomėnacėjė apduovėnuota Kovātė Eglė (Bartuvuos pruogėmnazėjė, 7b kl.), Skouda žemaitiu draugėjės nuomėnacėjė teka Preibiou Gvidou (Bartuvuos pruogėmnazėjė, 6b kl.), Skouda literatu kloba „Nuojos“ nuomėnacėjė pelnė Gineitītė Vėktuorėjė (Īlakiū gėmnazėjė, 8 kl.).
10–12 klasiu skaituovu kateguorijuo vertėnėma kuomėsėjė paskīrė: I vėita – Dargītē Muonikā (P. Žadeikė gėmnazėjė, IIa kl.), II vėita – Puociūtē Emā (P. Žadeikė gėmnazėjė IVb kl.), III vėita – Vaitkutē Vigailē (Īlakiū gėmnazėjė, G2 kl.). P. Žadeikė gėmnazėjės IIb klasės skaituovā už menėnė kuompuozėcėjė apduovėnuotė R. Granauskė bėbliuotekas padiekavuonė.
Linkam mūsa rajuona skaituovams sekmies regijuonėnemė kuonkorsa „Skaitīmā žemaitėškā“ etapė lapkrėtė 22 d.
