Vaserė 21 d. Skouda rajuona savėvaldībės R. Granauskė vėišuojie bėbliuotekuo bova rėngėnīs Tarptautėnē gimtuosės kalbuos dėinā pamėnavuotė. Anamė prėstatīta Raišutienės Juolantas autuoriniu dainū kninga „Spalvuotė nīkštokā“, apduovėnuotė devintuojė žemaitiu kalbuos dėktanta nogalietuojē ėr kėtė žemaitiu kalbuos keravuotuojē.
Skouda rajuona savėvaldīvės R. Granauskė vėišuoji bėbliuoteka so Skouda žemaitiu draugėjė kuožna meta vėsus kvėit rašītė žemaitiu kalbuos dėktanta, katruo ožvardėjėms īr „Vyturėlis čiulba gražiai, vo cīrulielis gėid dā gražiau“.
Šimeta vaserė 6 d. dėktants rašīts jau devinta karta. Vėinė rašė Skouda bėbliuotekuo, kėtė – īstaiguos, organizacėjuos a nomėi pri kompiuteriu, nes dėktants transliouts internetė. Ėr rašiosiu – daugiau nego vėsās kėtās kartās – 85. Be Skouda rajuona gīventuoju rašė žmuonis ėš Plungės, Mažeikiu, Telšiū, Šiauliū, Kretinguos, Klaipiedas miestu ėr rajuonu, Naujuosės Akmenės, Rėitava, Švėntuosės, Palonguos, Kauna, Vėlniaus. Ėr tarp anū bova ne tik žemaitē, bet ėr sava sogebiejėmus žemaitėška dėktanta rašīmė benuori ėšmiegintė aukštaitē.
Muokėnē, katrū šimeta bova 15, dėktanta parašė bėški sėlpniau nego paugosė̄jē, ta do apduovėnuotė paskatėnamāsēs prizās, vo vėinam paskėrta treti vėita. Vėsė anėi ėš Plungės „Saulės“ gimnazėjės. Šin karta lig priziniu vėitu šėik tėik pritrūka Muockevīčiūtē Friejē ėr Riepšā Pijou, vo prizėninkė – Nedošovenko Austiejė. Ož nuora sobortė vākus rašītė dėktanta tuos gimnazėjės muokītuojē Barnėškienē Ritā ėr sosėrinkosėms rašītė muokėnems skėrts saldos prizos.
Paugosiūju gropie trīs muotrėškas pelnė paskatėnamūsius prizus: Baranauskienė Silvėjė ėš Klaipiedas, Matevīčiūtė Genuoveita ėr Stražinskātė-Glinskienė Irena ėš Plungės.
Vo priziniu vėitu – cielas septīnės, nes vėn tik tretiū – pėnkės. Pėrmoujė ėš tretiū pelnė Kazlauskienė Duonata ėš Telšiū, ontroujė – jau mėnavuota Barnėškienė Rita ėš Plungės, tretė – Lekniovienė Danutė ėš Skouda (truopniau, ėš Rokū), ketvėrtoujė – Uduovīčios Arns ėš Vėlniaus, vo pėnktoujė – Kubelskienė Stanislava ėš Švėntuosės. Ontra vėita paskėrta Vaitkou Kēstotiou ėš Plungės. Vo pėrmoujė laimiejė vėsus devīnis kartus žemaitiu kalbuos dėktanta rašiusi ėr vėsus tarp nogalietuoju patekusi Kaniavienė Marītė ėš Skouda (truopniau, ėš Narvīdiu).
Paskatėnamūsius prizus ėr prizėnės vėitas pelniusius dėktanta dalīvius apduovėnuojė Skouda rajuona savėvaldībės R. Granauskė vėišuosės bėbliuotekas dėrektuorios ėr Skouda žemaitiu draugėjės pėrmininks Grušos Juons so ėš Skouda kėlosio kalbininko, valog katruo nostatītu žemaitėškas rašības taisīkliu ėr vertėnams dėktants, dr. Pabrieža Jūzaps.
Vėsėms prizėninkams kliova po Skouda rajuona savėvaldībės R. Granauskė vėišuosės bėbliuotekas dėpluomā ėr duovėna. Kuožnam duovėnū toriejė ėr Seima narė Martėnaitė Tuoma padiejiejė Gaižauskātė Deivida.
Skouda žemaitiu draugėjė kuožna meta apduovėnuo īmuonė, īstaiga arba organizacėjė, katra sava ožvardėjėmou arba reklamā vėišā vartuo žemaitiu kalba. Šimeta ta īstaiga – Editas picerėjė-kebabėnė. Apduovėnuojėma savėninkē Senkevīčienē Editā teikė Skouda žemaitiu draugėjės pėrmininks Grušos Juons ėr anuo pavadoutuojė Srougienė Bėrota.
Juolanta Rašutienė – Lėnkėmūs gėmusi mozėkas muokītuojė ekspertė, dainū kūriejė ėr atlėkiejė, žemaitiu kalbuos pruopagoutuojė, katrā Skouda žemaitiu draugėjė 2011 m. soteikė „Kėitiausė žemaitė“ tėtola. Darboujės Plungės „Saulės“ gimnazėjuo ėr Mīkuola Oginskė mena muokīkluo. Īr ėšlēdusi tris autuoriniu dainū kningas: 2020 m. – „Dainioukem žemaitėškā“ so 12 žemaitėšku dainū, 2021 m. – „Ateikite į šventę!“ so 11 dainū lietuviu bėndrėnė kalbo, 2024 m. – „Spalvuotė nīkštokā“ so 11 žemaitėšku. Ciela 10 ėš anū sosėrinkosė̄jē ėr ėšgėrda. Vuo ėš vėsa koncertė skombiejė 12 Raišutienės J. dainū, dainioujemu Plungės Mīkuola Oginskė mena muokīklas vākū ansamblė, jungtėnė vākū kuora, jaunutiu kuora, mergelku ansamblė, vuokalėnės gropės „Drogīs“, Petkevīčiaus Ėgnuota ėr Zaveckė Kristopa, Plungės „Saulės“ gimnazėjės mergelku ansamblė „Gimnazistės“ ėr vaikioku ansamblė „Gimnazistā“, Daukielātės Iglės ėš Skoudā vākū luopėšēlė-daržēlė ėr Lukauskė Arna ėš Rėitava. Vo paskotėnė tamė kocertė ėr geriausē žėnuoma Raišutienės J. daina „Žemaitėjė brongi, mes – tava vākā“ dainiava vėsė pruogramas dalīvē ėr žiūruovā.
Skouda rajuona savėvaldībės vicemerė Jeblonskė Inga duovėno ož pruocė, keravuojint žemaitiu kalba, padiekavuojė prėstatuomas dainū kningas autuorē Raišutienē Juolantā. Anā diekavuojė ėr Žemaitiu partėjės pėrmėninkė Stražinskātė-Glinskienė Irena. Vėsėms koncertou muokėnius paruošosėms muokītuojems – plungėškiems Bakanauskienē Irenā, Balbiuošiuovienē Linā, Jorkevīčē Kornelėjē, Raišutienē Juolantā – ėr skoudėškē Alonderienē Aušrā – padiekavuota kvietkuoms ėr bėbliuotekas duovėneliems, koncertavosėms vākams – saldainēs.
Rėngėni vedė Skouda rajuona savėvaldībės R. Granauskė vėišuosės bėbliuotekas Skaitītuoju aptarnavėma skīriaus vediejė Zabitienė Dalė ėr Skouda Bartovuos pruogimnazėjės muokėnie Zabitītė Daniela.
